Ciodo original in vera pele, nero, con sbrindoli drio la schena tra spala e spala, con teschio disegnà là del cuor, ex bobaza de viale vendi amulo giovine che volessi ciapar la qualifica de nagana.
Vestitini per fioluza, tuto color rosa, braghe e braghete, cotole e cotolete, tutine, bavarioi, mudandine, calzete e papuzete ricamade a man vendo causa sbalio de ecografia.
Belissimo vestitin bianco per la cresima, con un bel velo biancolongo, fiocheto panna, cotola longa e lustra, mai usado, vendo perché sta sempia de mia fia ghe ga verto la porta ai testimoni de Geova.
Anfibi neri con borchie de fero, numero 46, punta rinforzada, tacoconcavo per sconder picoli strafanici, alti fin soto el zenocio, gloriosamente usadi per le trasferte a Vicenza, Padova e Udine e per vitoriosi assalti ai pulman, ultras de l'Unione vendi a giovane aspirante frequentador de stadi.
Vestito de sposa, novo mai doprado, con tul e strass, pizzi e lazzi,spaline con perline, misura 44 completo de combinè e cercio per i cavei, se po ve ciamè Ucia e el vostro sposo Nando go anche do bele vere de ocasion.
Capoti, traverse, cotole, maie, maioni, camise, mudande, canotiere,barete e scufioti, vendo causa cambio taglia. Telefonare a Nadia la s'gionfa.
Scarpe de baba leopardade, con punta e taco alto, eleganti ma sportive, tipo stivaleto alto fin meza coscia abinabile con ghepier rossa, vendo causa cessazione attività - Ugo.
El copyright xè de Cadena che ringrazio per la sua costante e puntuale ilarità istriana.
